بسم الله الرحمن الرحيم
شجرة رمضان فكرة بسيطة تجمع الأسرة مع بعضها لتمضيه وقت ظريف فى تنفيذ فكرة جميلة وهادفه، فهذه الفكرة يمكنك تنفيذها مع أطفالك وتقدرى بيها تعلميهم أشياء كثيرة عن هذا الشهر الكريم
هتجيبى ورق ملون وقصى منه لوحه وقصى شكل شجرة والصقيها على اللوحة واعملى لها عدد من الأوراق وممكن كمان تعملى عليها بعض الورود أو العصافير حسب رغبة أطفالك واكتبى على كل ورقه منهم حاجة عايزه تنفذيها مع أطفالك فى رمضان مثل إطعام الفقراء، شنطة رمضان، مساعده المحتاج، صله الرحم، الصلاة فى جماعة، قراءة القرآن، التعاون مع الغير، الصبر، الاخلاص، قيام الليل.
كمان ممكن ورقة الشجر يتكتب عليه العمل المراد عمله وتخلى الطفل يقص شكل طائر أو ورده بجوار هذه الورقة ويكتب الخطوات اللازمة لتنفيذ هذا العمل وبكدا بتكونى بتعلميه عمل خطط لتنفيذ أى عمل ودا هينفعه أكيد فى التخطيط لكل شئ فى حياته بعد كدا.
وكل حاجة من اللى اتكتبت تم تنفيذها يمكن وضع نجمه عليها اسم الطفل على الورقة وفى نهاية شهر رمضان وفى أيام العيد الأب والأم يشوفوا عدد النجوم اللى حصل عليها كل طفل وأكثر طفل يحصل على نجوم يكون له هدية مميزة له من الأب والأم مكافئه له.
شجرة رمضان فكرة من موقع جنتي ونتمنى منكم تشركونا بأفكاركم حتى تصبح الفكرة أحلى وأجمل.
فى انتظاركم
