ماذا تفعل لو كنت .. رئيس !!

11 أغسطس، 2018

[font=”comic sans ms”]سلام الله عليكم ورحمته وبركاته ..

تحية طيبة لكل أعضاء وعضوات المنتدى الكرام ..

شوفو بقى ..

أحنا في عصر العولمة .. وعصر السموات المفتوحة .. وعصر الانترنت .. وعصر الطماطم والشعوب ..

وكل واحد فينا اتفرجله على فيلم وثائقي على الجزيرة ولا في الناشيونال جيوجرافيك .. افتكر نفسه عالم أثار ولا محلل نفسي أو سياسي عظيم ..

المعلم حسونة أبو كف في قهوة الربع .. قاعد ماسك الليّ بتاع الشيشة وحاطط المبسم في بقه .. والدخان طالع .. الله ينور .. وحاطط رجل على رجل .. وفي بنصره .. خاتم فضه بفص فيروز .. وزنه ربع كيلو .. وشنباته طولها ربع متر .. يقف عليها حمار ..

المعلم حسونة .. صاحب قهوة الربع .. معاه شهادة (نحو الأمية) .. أخدها من سنتين بالغش علشان الرخصة بتاعة العربية الربع نقل السوزوكي .. اللي بيروح بيها السوق يجيب مشتروات القهوة .. ولما قالوله لازم يكون معاك شهادة محو الأمية علشان تطلع رخصة السواقة .. أخدها بالغش والرشوة .. وبقت معاه شهادة .. نحو الامية ..

كل يوم المعلم حسونة يجبر الناس اللي قاعدة على القهوة إنهم يسمعوا نشرات الأخبار كلها في كل القنوات .. وهو قاعد يتفرج وحاطط رجله على ركبة رجله التانية .. والشيشة في بقه .. وفي ايده التانية ريموت التليفزيون .. يتنطط بين نشرة للتانية في قنوات الاخبار العربية ..

المشكلة إنه مش فاهم حاجة تقريباً .. لأن النشرة بالفصحى .. وكل شوية ينده على بيومي أفندي .. الراجل اللي طلع معاش من 12 سنة .. وكان باشكاتب في ارشيف وزارة الزراعة .. ويدور حوار زي ده ..

المعلم حسونة: يا سي بيومي أفندي .. إيه رأيك في اللي بتقوله الست دي .. بيومي أفندي: يا معلم .. العراق مش هاتتحل مشكلتها .. إلا لما العرب ياخدو موقف مع بعضهم .. ويقفوا ضد الانجليز .. حرشة (صبي القهوة المشاغب) بكل خبث: يا بيومي أفندي .. الانجليز مشيوا من أيام الثورة .. بيومي أفندي: قصدي الامريكان يا حرشة .. ماتقعدليش كده ع الواحدة .. المعلم حسونة للواد حرشة بكل غيظ: اجري ياض هات ولعة .. لما الكبار يتكلموا .. الصبيان تخرس .. فاهم ولا أقوم افهمك؟؟ حرشة: حاضر يا معلم .. المعلم حسونة: شوف يا بيومي أفندي .. أمريكا دي عاوزالها واحد زي عبد الناصر .. صعيدي .. يطلع عليهم في نهار مافيهوش شمس .. ويولع فيهم كلهم .. بيومي أفندي: يا معلم .. عبد الناصر مات .. وراحت أيامه .. لازم رؤساء العرب كلهم يتحدوا مع بعض .. ويواجهو الأمريكان .. وبعدين .. كله كوم .. واسرائيل كوم تاني .. يعني لو قدرو على الامريكان .. هايعملوا ايه في اسرائيل !! المعلم حسونة: أهي زفت الطين دي هي اللي بتصحيني من عز النوم كل ليلة .. بأحس إنهم دخلو بيتي على حريمي .. الله يلعنهم كلهم .. حرشة وهو ينفخ في الولعة (بكل خبث): ماهو كل الرؤساء العرب يا معلم من ساعة ما اسرائيل دي طلعت في الدنيا .. وهم بيحاربوها ومش عارفين .. المعلم حسونة بصوت مرتفع: ياض أنا مش قلتلك تسكت خالص لما الكبار يتكلموا !! اجري ياض شوف شغلك .. أحسن أقوم اوريك شغلك !! المعلم حسونة لبيومي افندي: الواحد كل يوم يصحى الصبح .. اسمع النشرة وأقول .. يارب حماس تكون ضربت اسرائيل .. وفتح فتحت عليهم كل الابواب .. ومصر دخلت من رفح .. ونصرالله وحزبالله .. يكون دخلو من الناحية التانية .. وياكلوهم أكل .. والله يا بيومي افندي ومالكش عليا يمين .. لما باشوف الفلسطينيين في النشرة وهم متعورين ومجروحين ومقتولين .. بيكون هاين عليا أقوم اكسر التليفزيون .. بيومي أفندي والأسى على ملامحه: طب نعمل ايه .. ماهو انت شايف يا معلم .. الناس في مصر مابقتش عارفة تعيش .. مش لقياها من العيش وهمه .. ولا الأمراض .. ولا الصرف الصحي .. ولا التعليم .. ولا ايه ولا ايه ولا ايه .. تفتكر يا معلم لو مصر الناس عايشة فيها كويس .. كانوا سكتوا على اللي بيحصل ؟؟ والله أبداً .. المشكلة إن الناس ملهية في اكل عيشها .. ومش عارفة تعيش .. والراجل من دول طول النهار والليل بيكد ويفحت في الصخر علشان يلاقي قوت عياله .. الناس حالها صعب .. المعلم حسونة: يعني يا بيومي افندي .. أخويا يضرب ويتهان ويتقتل .. وأنا أتحجج بإن ظروفي صعبة ! بيومي أفندي: لا طبعاً .. بس قلي الناس تعمل ايه !!؟؟ اللقطة اللي فاتت دي .. من محض خيالي .. وانا كتبتها علشان أنقل صورة بتتكرر قدامنا كلنا بأسماء مختلفة .. وفي اماكن مختلفة .. لكن الحوار مضمونه واحد ..

لو صحيت الصبح .. بقيت رئيس مصر .. مثلا مثلا يعني :)

ياترى هاتعمل ايه .. وناوي تتصرف ازاي ..

علاقاتك الخارجية هاتبقى ازاي .. هتقاطع مين .. وتصالح مين .. وتربط مع مين ..

هتحل مشاكل مصر الداخلية ازاي ..

ايه رأيك في الدستور .. ولو مش عاجبك .. هتعدل فيه ايه ..

وايه رأيك في التعليم والصحة وباقي الخدمات .. هتحل مشاكلها ازاي ..

هتقسم الميزانية بتاعة الدولة ازاي ..

إيه دورك في قضية فلسطين ..

وإيه دورك في مشكلة الماء والبيئة ..

هاتعمل ايه مع مشكلة السكان والاسكان ..

المواصلات والسكة الحديد والطرق ..

الكهرباء مشكلة الطاقة ..

الري والزراعة ..

الصناعة والتجارة الداخلية ..

التموين والعيش وما أدراك ما العيش ..

قول بكل استفاضة وبالراحة وحبة حبة عليا .. وفندلنا رأيك وفكرك .. علشان نفهمك ..

أنا كاتب الموضوع ده .. لهدفين ..

الأول .. لازم نعرف رؤى وتصورات بعض .. ونشوف إذا كنا إيجابيين ولا سلبيين مش المنتدى أسمه فكرنا !! الثاني .. علشان كل واحد فينا يصحح افكاره من خلال الاطلاع على أفكار زملائنا الأعضاء .. يمكن اللي انا شايفه صح .. تقولولي انه غلط .. والعكس .. وطبعاً أنا بأكد إن إدارة المنتدى لازم يشاركو في الموضوع ده .. علشان يورونا الديموقراطية بحكم إنهم قيادة .. بس مصغرة على قدنا :)
وكل الأعضاء مطلوب مشاركتهم .. وخصوصاً الأعضاء العرب .. علشان نشوف وجهات النظر كلها :) والسلام عليكم ورحمة الله وبركاته[/color] [/color][/font]